Ölkəmizdən xaricə işləmək üçün gedən insanların sayı kifayət qədərdir. Onların işləmək üçün müxtəlif ölkələrdə üz tutduqlarını görürük. Hazırda ölkə xaricində karyera planları quran şəxslər də müxtəlif ölkələrdəki iş imkanlarını araşdırırlar. Təbii ki, üz tutulan ölkənin hara olmasından asılı olmayaraq həmin ölkədəki iş imkanlarını araşdırmaq lazımdır. Vətəndaşlarımızın iş üçün gedə biləcəyi ölkələrdən biri də Danimarkadır. 

Bəs Azərbaycandan Danimarkaya getmək istəyənlər hansı sahələri araşdırmaldır? 

Valyuta.az-a danışan Danimarkada qlobal mebel istehsalçısı olan “Tvilum” şirkətində baş satınalma kateqoriya meneceri işləyən azərbaycanlı Elçin İbrahimov deyir ki, Danimarkada bir neçə sahə var ki, çox inkişaf edib və gələcək üçün çox potensiallı istiqamətlərdir:

“Bunlardan biri bərpa olunan enerjidir. 70-80-ci illərdə neft böhranından sonra qiymətlər həddindən artıq artanda, Danimarka görür ki, təbii resursları yoxdur, xarici faktorlardan asılı vəziyyətə düşür. Dövlət belə qərar verir ki, bərpa olunan enerjiyə investisiya etsinlər. 10 illiklərlə sərmayə buraxılır. Nəticədə 2000-ci illərdə bir neçə Danimarka şirkəti bərpa olunan enerji sahəsində çox böyük biznes qurur, əsasən də külək enerjisi üzərindən. Bu sahə böyükdür, həm quruda, həm də dənizdə işlər var. Bu sahənin mütəxəssisləri Danimarkaya gələ bilərlər, yaxud elə bu sahədə təhsil üçün də gələ bilərlər”.

E.İbrahimov ikinci sahənin tibb olduğunu qeyd edir:

“Danimarka bu sahədə də tanınır. Məsələn, “Novo Nordisk” insulin istehsal edən şirkətdir, bütün dünyada tanınır. Onların çox geniş yayılan ikinci məhsulları “Ozempic” var, insanı arıqladır. Heç bir zərəri olmayan dərmandır, içirsən, səni arıqladır. O şirkət o qədər böyükdür ki, Danimarka iqtisadiyyatını ölçəndə, Danimarkanın ümumdaxili məhsulu və “Novo Nordisk”in ordakı payını bir-birindən ayrı tuturlar. Bu şirkətin market dəyəri Danimarkanın ÜDM-dən 1,5 dəfə çoxdur, Azərbaycanın ÜDM-dən isə 8 dəfə çoxdur”.