Siqaretin idxalı sahəsində yeni tələb qoyulub. Belə ki, tütün məmulatı qismində siqaretin idxalı şərtlərindən biri kimi idxalçı ən azı 1 il müddətində tütün məmulatının istehsalı sahəsində fəaliyyəti göstərməlidir. Bu, Milli Məclisin bu gün keçirilən iclasında müzakirəyə çıxarılan “Tütün və tütün məmulatı haqqında” qanuna təklif edilən dəyişiklikdə əksini tapıb. Qanun layihəsi səsverməyə çıxarılaraq üçüncü oxunuşda qəbul edilib.

Bəs bu qərar siqaretin qiymətinə necə təsir edəcək? 

Mövzu barədə Valyuta.az-a danışan iqtisadçı ekspert Xalid Kərimli deyir ki, bu qərar siqaret idxalının çətinləşməsidir:

“Yəni, tütün monopoliyasının lobbiçiliyi ilə ortaya çıxan qanun layihəsidir. Ölkəyə siqaret idxal etmək istəyən şəxslərə istehsalla məşğul olmaq tələbi qoyulması absurd maddədir. Təbii ki, bu yerli istehsalın gücünün artırılması və rəqabətin daralmasına yönəldilib. Bu qərar siqaretin qiymətlərini bahalaşdıra bilər. Bazara giriş imkanlarının məhdudlaşdırılması yaxşı nəticələr vəd etmir”.

Əvəz Həsənov