2023-cü ildə Azərbaycan 417 min 81 ABŞ dolları dəyərində müxtəlif növ güllər ixrac edib. Bəs gül istehsal etmək üçün bu sahəyə nə qədər investisiya yatırmaq lazımdır?

Valyuta.az bu istiqamətdə araşdırma aparıb. “Azərbaycan Gül İstehsalçıları, İdxalçıları və İxracatçıları Assosiasiyası” İctimai Birliyinin Cavid Axundov deyib ki, gül istehsalına başlamaq daha çox hansı gül növünün istehsalından asılı olan məsələdir.

Sənaye üsulu qızılgüllərin istehsalının əsasən istixana şəraitində aparıldığını deyən C.Axundov yatırım üçün hansı məbləğə ehtiyac olduğunu da bildirdi: “Bu, həyətyanı, yaxud da istixana sahəsi ola bilər. Sənaye tipli istixanalarda gül istehsalının təşkili 1 hektarda müasir texnologiyaların tətbiqi ilə istehsalın dəyəri 1 və 3 milyon ABŞ dolları arasında dəyişə bilər. Burada daha çox Hollandiya və İsrail texnologiyalarından istifadə edilir”. 

C.Axundov qeyd edib ki, gülün ənənəvi üsulla yetişdirilməsi zaman isə lazım olan investisiya fərqlidir: “Polietilenlə bağlanmış istixanalarda isə  biznesə girişin məbləği 200-300 min manat arası ola bilər. Müasir texnologiyaların tətbiqi xərclənən vəsaiti artırır”. 

O vurğulayıb ki, Azərbaycanda ən çox satılan güllər qızılgüldür: “Qızılgül üçün ən optimal əkin yeri əsasən dağətəyi ərazilərdir: Qızılgüllərin dünyada 400-dən çox, Azərbaycanda 40-dan artıq növü bitir. Qızılgül Azərbaycanda çox qədimdən əkilib becərilir. Çiçəyinin qurulu və formasına, rənginə, ətrinə, gözəlliyinə görə ən dekorativ bitkilərdən biri hesab olunur. Hazırda qızılgülün 2000 mindən artıq çeşidi vardır. Bunlar öz dekorativ və bioloji xüsusiyyətlərinə görə bir çox qrupa bölünürlər”. 

C. Axundovun sözlərinə görə, qızılgüllərin topdansatış qiyməti mövsümdən aslı olaraq 1 manat 50 qəpik, yaxud da 2 manat 50 qəpik ola bilər. 

Assosiasiyası rəhbəri qeyd edib ki, hazırda  ölkədə gül istehsalında çətinliklər yoxdur: “Hazırda dünyada su qıtlığı ilə bağlı çətinlər var.  Bu, bütün sahələrə təsir göstərir. Ona görə də gül istehsalçıları daha çox damlama suvarma sitemlərindən istifadə etməlidirlər”.

Nara