2023-cü ildə Azərbaycanda 19 qeyri-iş günü müəyyən edilib. Tətil günləri həftə sonları ilə birləşdiriləndə isə, bu istirahət günlərinin sayı daha çox görünə bilir. İşəgötürənlər bəzən bununla bağlı paylaşım edirlər ki, qeyri-iş günləri Azərbaycanda çoxdur, bu, onların bizneslərinə ziyandır. Qeyri-iş günləri şirkətlərə nə kimi zərər vurur?

İqtisadçı Murad Calalov Valyuta.az-a bu barədə danışdı. O, xarici təcrübəyə istinad edərək bildirdi ki, Azərbaycanda qeyri-iş günləri bütün ölkəni əhatə etdiyi üçün şirkətlərə ziyan dəyir:

“Bayramlarda işləməyən şirkətlərə əlbəttə ki, ziyan dəyir. Həmin dönəmdə gəlir əldə etmirlər. Amma bəzi ölkələrdə, məsələn, Almaniyada əyalətlər var. Əyalətlərdə qanunverici və icraedici orqanlar var. Hər əyalətin özünə xas qanunları, bayramları var. Bir şirkət bir əyalətdədirsə, işçilərin bəziləri bu, bəziləri digər əyalətdə və ya başqa ölkələrdə ola bilər. Bayram olan günlər bu əyalətdə bayramdırsa, digər əyalətdə bayram deyil. İşçilər bayram olmayan yerlərdə bu şirkət üçün işləyə bilirlər. Burada balanslaşma var. Azərbaycanda əyalətlər əvəzinə bölgələr var, amma qanunlar, bayramlar bölgələrə xas deyil, ümumidir”.

Murad Calalov bildirir ki, Azərbaycanda belə olmasa da, şirkətlər bunu tənzimləyə və ya işləri əvvəlcədən planlaşdıra bilər. Belə olsa, şirkətlər nəinki itirər, əksinə qazana bilərlər: 

“Şirkətlər işləmədiyi günlərə görə işçilərə maaş ödəyir, amma həmin günlərdə şirkətdə işlər getmir. Bu baxımdan yanaşsaq, şirkət burada itirir. Amma indiki dönəmdə bir çox şirkətdə robotlaşma gedir. Yəni öncədən planlaşdırılır, işçilər işləməyəndə robotlar davam edir. Hətta elə şirkətlər var ki, bayramlar vaxtı külli miqdarda qazanc əldə edirlər”.

Nuray