Azərbaycanda iki investor bankın 2,5 milyon dollarlıq istiqrazlarını alıb. 

Valyuta.az xəbər verir ki, Accessbank QSC-nin istiqrazlarının yerləşdirilməsi üzrə hərrac keçirilib. İyunun 14-də Bakı Fond Birjasında bankın tədavül müddəti 18 ay, nominal dəyəri min ABŞ dolları olan 2,5 milyon dollar həcmində, faizli, təmin edilməmiş sənədsiz, adlı istiqrazlarının yerləşdirilməsi üzrə hərrac yekunlaşıb. 

Hərrac zamanı 2 investor tərəfindən min dollar qiymətindən 2 sifariş təqdim edilib. İstiqrazların kəsmə qiyməti və orta ölçülmüş qiyməti min dollar müəyyən edilib. İstiqrazın illik faiz dərəcəsi 6.00%, faiz ödəniş dövrü isə hər 3 təqvim ayından bir təşkil edir. İstiqrazlar yerləşdirilmiş tam həcmdə investorlar tərəfindən alınıb. 

 Qeyd edək ki, istiqrazların ödəmə tarixi 14.12.2025-cü ildir. Yerləşdirmə üzrə anderrayter isə Unicapital İnvestisiya Şirkətidir. 

Xatırladaq ki, AccessBank 2002-ci ildə yaradılıb. Onun  əsas səhmdarları Asiya İnkişaf Bankı, Avropa İnvestisiya Bankı və Beynəlxalq Maliyyə Korporasiyasıdır.

Leyli