“Azər-Türk Bank”ın rəhbərliyi 2023-cü ildə 1 milyon 18 min manat gəlir əldə edib. 

Valyuta.az-ın əldə etdiyi məlumata görə, bu, 2022-ci ilə nisbətən 15,2% və ya 868 min manat çoxdur. Belə ki, 2022-ci ildə bankın rəhbərliyinin gəlirləri 948 min manat təşkil edib. 

Bu məbləğə bankın İdarə Heyəti və Müşahidə Şurasına daxil olan şəxslərin sosial ödəmələri və əməkhaqları daxildir. Belə ki, sözügedən ödəmələrin 200 min manatı sosial ödəmələrə yönəldilib. Bu, 2022-ci ilə nisbətən 11,1% çoxdur.

Ödənişlərin 818 min manatını isə əməkhaqları təşkil edib. Son bir ildə ATB rəhbərliyinin əməkhaqları 6,5% artıb. Belə ki, 2022-ci ildə bank rəhbərliyi ümumilikdə 768 min manat əməkhaqqı ödənilib. 

Hazırda bankın rəhbərliyində 8 nəfər təmsil olunur. Bura bankın Müşahidə Şurasının sədri Əlixanov Ruslan, MŞ-nin iki üzvü- Günel Nəbiyeva və Pərvin Manafov, İdarə Heyətinin sədri Orxan Hüseynov, İH-nin üzvləri İslam Musayev, Orxan Qədirbəy, Araz Gəncəli və Emil Ələkbərov daxildir. 

Bu isə o deməkdir ki, 2023-cü ildə bank rəhbərliyində təmsil olunan hər bir şəxsin orta illik gəliri 102,3 min manat təşkil edib. 2022-ci il üzrə bu rəqəm 96 min manat təşkil edib. 

Xatırladaq ki, "Azər-Türk Bank" 1995-ci ildə yaradılıb. Onun nizamnamə kapitalı 50 mln. manatdır. Bankın səhmlərinin 75%-i Azərbaycan hökumətinə, 12,4%-i Türkiyənin "Ziraat Bank"ına, 1,1%-i "Ziraat Bank İnternational"a, 6,5%-i "AzRe Təkrarsığorta"ya, 5%-i isə "Qala Həyat Sığorta"ya məxsusdur.

Leyli