Bəzi banklar son vaxtlar əmanət faizlərini azaldırlar. Bu həm qısa müddətli əmanətlərə, həm də uzun müddətli əmanətlərə şamil edilir. Bu kimi bankların depozit faizlərinin aşağı salmasının müxtəlif səbəbləri var. Bu barədə Valyuta.az-a danışan iqtisadçı Eldəniz Əmirov bildirib ki, adətən bankların əmanət cəlb etməkdə məqsədi özlərinin fəaliyyət istiqamətində müəyyən qədər vəsaitlərini artırmaqdır:

“Əgər, hansısa bankın digər istiqamətlərdən gəlirləri varsa, o zaman bankın əmanətlərə çox da ehtiyacı olmur. Eyni zamanda ola bilər ki, bankların əmanətlərə yüksək səviyyədə ehtiyacı olmasın və ya əmanəti cəlb etmək üçün yuxarı faiz verməsinə ehtiyacı yoxdur. Əsasən də, əmanətçilərin etibarını qazanmış banklarda depozit faizləri o qədər də yuxarı olmur. Çünki risklər artdıqca faizlər də yuxarı olur”.

İqtisadçı vurğulayıb ki, birmənalı olaraq bütün banklar depozit faizlərini aşağı salmır: “Bəzi banklarda depozit faizlərində artımlar da var. Hətta bu artımlar kredit faizlərinin artmasına təhdid kimi qiymətləndirilən məqamlar da ola bilər”.

Əvəz Həsənov