"Accessbank" “Əlverişli” əmanət məhsulu üzrə faiz dərəcələrinin azaldılmasının səbəblərini açıqlayıb.

Bankdan "APA-Economics"ə bildirilib ki, “Əlverişli” əmanət üzrə faiz fərəcələri min manata qədər depozitlər üçün 0,1% səviyyəsində saxlanılıb, 1 000 – 30 000 manata qədər əmanətlər üzrə 4,5%-dən 3%-ə, 30 000 – 100 000 manata qədər məbləğə 5%-dən 3,5%-ə, 100 000 manatdan yuxarı depozitlər üzrə isə 6%-dən 4,5%-ə qədər azaldılıb. Azalmanın əsas səbəbi Mərkəzi Bank tərəfindən aparılan faiz siyasətinə uyğunlaşmasıdır (uçot dərəcəsi nəzərə alınmaqla) ki, bu da öz növbəsində bankların depozitlərə təklif etdiyi əmanət faizlərinə birbaşa təsir göstərir.

10:58

“Access Bank” yanvarın 18-dən etibarən əmanət faizlərini kəskin endirib. 

Valyuta.az bu barədə banka istinadən xəbər verir. Məlumata görə, bank 30 min manata kimi depozitlər üzrə faiz dərəcəsini 4,5%-dən 3%-ə, 100 min manata kimi depozitlər üzrə 5%-dən 3,5%-ə, 100 min manatdan çox olan depozitlər üzrə isə 6%-dən 4,5%-ə endirib. Başqa sözlə, bank əmanətlərin gəlirliliyini 1,5% azaldıb. Bu isə yerli banklar arasında ən aşağı göstəricidir. Faizlərin kəskin endirilməsi bank əmanət qəbuluna həvəsli olmadığını göstərir. 

Qeyd edək ki, bu il yanvarın 1-nə bankın əmanət portfeli 1 mlrd. 51,6 milyon manata yüksəlib ki, bu da 2023-cü ilin ilk yarısı ilə müqayisədə 66 mln. manat çoxdur. 

Bankın kredit portfeli isə 2023-cü ildə 1mlrd. 13,7 mln. manata bərabər olub. Başqa sözlə, bankın kreditlərinin depozitlərə nisbəti (LDR) 96%-dir.  

Xatırladaq ki, "Access Bank" 2002-ci ildə yaradılıb. Onun nizamnamə kapitalı 258,7 milyon manatdır. Bankın əsas səhmdarları Asiya İnkişaf Bankı (20,33%), Avropa İnvestisiya Bankı (17,76%), Beynəlxalq Maliyyə Korporasiyası (15,86%), Hollandiya İnkişaf Bankı (9,62%) və Avstriya İnkişaf Bankıdır(9,36%).

Leyli