Ötən il “Expressbank”ın xalis mənfəəti illik müqayisədə 3,2% və ya 393,9 min azalaraq 12,01 milyon manata  enib. Halbuki, 2022-ci ildə bank 12,4 milyon manat xalis mənfəət əldə etmişdi. 

Valyuta.az bu barədə bankın maliyyə hesabatına istinadən xəbər verir. 

Hesabat dövründə bankın faiz gəlirləri 19.5% artaraq 57,7 milyon manat, faiz xərcləri isə 50.2% artaraq 15,5 milyon manat təşkil edib. Bu dövrdə bankın qeyri-faiz gəlirləri 18,96 milyon manata (illik müqayisədə 2.8% çox), qeyri-faiz xərcləri isə 42,7 milyon manata (illik müqayisədə 5,4% çox) bərabər olub. Beləliklə, bank bu dövrdə 18,5 milyon manat əməliyyat mənfəəti əldə edib ki, bu da 2022-ci ilə nisbətən 19% və ya 2,9 milyon manat çoxdur.

Cari ilin yanvarın 1-nə bankın aktivləri illik müqayisədə 28,2% və ya 123,3 milyon manat artaraq 560,2 milyon manata yüksəlib. Ötən il “Expressbank”ın kredit portfeli (müştərilərə verilmiş kreditlər) 2,6 dəfə artaraq 409,3 milyon manata çatıb. Bankın kredit portfelində istehlak kreditləri 189,4 milyon manat, biznes kreditləri 113,4 milyon manat, daşınmaz əmlak kreditləri isə 106,5 milyon manat təşkil edib.

Bu dövrdə “Expressbank”ın cəmi öhdəlikləri 430,3 milyon manat təşkil edib ki, bu da illik müqayisədə 20% çoxdur. Bankın depozit portfeli də ötən il 19,3% manat artaraq 230,4 milyon manata çatıb. Maraqlıdır ki, bankın kredit təşkilatları və maliyyə institutları qarşısında öhdəlikləri son bir ildə 2,3 dəfə və ya 87 milyon manat artıb. 2022-ci ildə bu öhdəlik 67,5 milyon manat olubsa, ötən il bu rəqəm 154,4 milyon manata kimi yüksəlib.

2023-cü il üzrə “Expressbank”ın cəmi kapitalı əvvəlki il ilə müqayisədə 0,6% artaraq 129,9 milyon manat təşkil edib.

Leyli