Azərbaycanda valyuta mübadiləsi xidməti göstərən 5 şirkət - “Eliko”, “Delta Capital”, “Zuhur”, “Bakı Mərkəzi Valyuta” və "Meta-Kapital" MMC-lər Azərbaycan Mərkəzi Bankının (AMB) bu fəaliyyət növünə kapital tələbi qoymasından xəbərsizdir.

Valyuta.az xəbər verir ki, bu, "Report"un şirkətlər arasında keçirdiyi sorğu nəticəsində məlum olub.

Bazar iştirakçıları tənzimləyici qurumdan bu barədə onlara məlumat daxil olmadığını bildirir və hər hansı şərh vermək istəmir. Şirkətlərdən yalnız birinin - "Eliko"nun direktoru Ramil Kazımov bunları bildirib: “AMB-nin qərarı barədə rəsmi qaydada məlumat almasaq da, bu barədə eşitmişik. Hələ ki, köhnə qaydalarla işləyirik. Həmin yenilik yəqin ki, gələn ildən tətbiq olunacaq. Kapital tələbi yüksək olsa da, ona uyğunlaşmaq lazımdır. Bizim sahə elədir ki, kapital nə qədər çox olursa, imkanlar da o qədər geniş olur”.

Xatırladaq ki, AMB-nin Kollegiyasının təsdiq etdiyi və qurumun sədri Taleh Kazımovun imzaladığı “Valyuta mübadiləsi fəaliyyətinin həyata keçirilməsi üçün nizamnamə (şərikli) kapitalının minimum miqdarı, girov vəsaitinin məbləği və geri alınmasına dair rəyin forması ilə bağlı Tələblər”ə əsasən, valyuta mübadiləsi fəaliyyətinə lisenziya almaq istəyən şəxslərə, eləcə də hər obyektə görə nizamnamə kapitalının minimum həddi müəyyən edilib. Belə ki, valyuta mübadiləsi fəaliyyəti üçün kapital tələbi I bölgədə (Bakı) 600 min manat, hər əlavə obyektə görə 300 min manat, II bölgədə (Abşeron, Sumqayıt və Gəncə) 450 min manat, hər əlavə obyektə görə 150 min manat, III bölgədə (I, II və IV bölgələr istisna olmaqla, digər ərazilərdə, həmçinin Naxçıvan MR-da) 375 min manat, hər əlavə obyektə görə 75 min manat, IV bölgədə (Şərqi Zəngəzur və Qarabağ iqtisadi rayonlarının işğaldan azad edilmiş əraziləri) 300 min manat, hər əlavə obyektə görə 0 manatdır.

Bu Tələblərdə nəzərdə tutulan nizamnamə (şərikli) kapitalına dair tələblər eynilə qeyri-rezident hüquqi şəxsin filialının nizamnamə kapitalına bərabər tutulmuş vəsaitinə şamil ediləcək. Bundan başqa, valyuta mübadiləsi fəaliyyətinə lisenziya və ya onun əlavəsini almaq istəyən şəxs müvəkkil bankda minimum nizamnamə (şərikli) kapitalının 10 %-i məbləğində girov vəsaiti yerləşdirməlidir.

Valyuta mübadiləsi fəaliyyətinə lisenziya almış şəxslər bu tələblər qüvvəyə mindiyi tarixdən 6 ay ərzində minimum nizamnamə kapitalının formalaşdırılması, habelə girov vəsaitinin məbləğinin yerləşdirilməsi ilə bağlı müvafiq tədbirlər görməli və bununla əlaqədar müvafiq sənədləri həmin müddətdə AMB-yə təqdim etməlidirlər.