“Premium Bank” 2023-cü ilin III rübünü 7,9 milyon manat mənfəətlə bitirib.

Valyuta.az bu barədə banka istinadən xəbər verir.

Hesabat dövründə bankın faiz gəlirləri 4.6% artaraq 24 milyon manat, faiz xərcləri isə 5.3% artaraq 7,83 milyon manat təşkil edib. Bu dövrdə bankın qeyri-faiz gəlirləri 13.6 milyon manata (illik müqayisədə 5.8% çox), qeyri-faiz xərcləri isə 23.4 milyon manata (illik müqayisədə 13.5% çox) bərabər olub. Beləliklə, bank bu dövrdə 6,35 milyon manat əməliyyat mənfəəti əldə edib ki, bu da ötən ilin müvafiq dövrü ilə müqayisədə 17.8% və ya 1,4 milyon manat azdır. 

Qeyd edək ki, Bank 2022-ci ilin yanvar-sentyabr ayları ərzində 7,72 milyon manat əməliyyat mənfəəti əldə etmişdi.

Bu ilin III rübündə bank 15 milyon manata yaxın kiçilib. Belə ki, cari ilin oktyabrın 1-nə bankın aktivləri ilin əvvəli ilə müqayisədə 2.1% və ya 14.8 milyon manat azalaraq 677,36 milyon manata enib. Cari ilin ilk 9 ayında “Premium Bank”ının kredit portfeli (müştərilərə verilmiş kreditlər) 0.9% və ya 3.9 milyon manat azalaraq 433,3 milyon manata enib.

Bu dövrdə Bankın cəmi öhdəlikləri 496,7 milyon manat təşkil edib ki, bu da ilin əvvəlinə nisbətən 2.5% və ya 12.9 milyon manat azdır. Bankın depozit portfeli də cari ilin ilk 9 ayında 3.3% və ya 15.1 milyon manat azalaraq 451,3 milyon manata enib.

2023-cü il oktyabr ayının 1-nə “Premium Bank”ın cəmi kapitalı ilin əvvəli ilə müqayisədə 1% və ya 1.9 milyon manat azalaraq 180,6 milyon manat təşkil edib.

Leyli