“Bağlanan bankların illik mənfəətləri bəzən 200-300 min manat civarında olur. Bu, ölkəmizdəki bank sektoru üçün ən aşağı mənfəət göstəricisidir”.

Bunu Valyuta.az-a açıqlamasında iqtisadçı Məhəmməd Talıblı bildirdi. O, deyir ki, aşağı mənfəət zamanla bankın sonunu gətirir: “Məsələn, ilk üçlükdə olan bankların mənfəəti 40-50 milyon manat civarında olduğu halda kiçik ölçülü bankların aşağı səviyyədə olması həmin bankların fəaliyyətini çətinləşdirir. Toksik kreditlər yaranan zaman bu risk bir az da artır”.

İqtisadçı deyir ki, hər bağlanan bank insanların banklara olan güvəninə təsir edir: “Düzdür, 100 min manata qədər əmanətlər sığortalanır və o vəsaitlər Əmanətlərin Sığortalanması Fondu tərəfindən əmanətçilərə verilir. Risk sığortalanmayan əmanətlərlə bağlı olur. Məlumatlılıq çoxdur deyə, insanların böyük qismi əmanət yerləşdirən zaman 100 min manatlıq limiti nəzərə alırlar. Ancaq yenə də bankların bağlanması insanların bank sektoruna güvəninə təsir edir. Çünki bank sektorunun likvidliyi ilə yanaşı, insanların bu sektora güvəni də çox önəmlidir. Bunsuz bank sektoru mövcud ola, iqtisadiyyatın qan-damar sistemini təmin edə bilməz. Bu baxımdan güvən çox önəmlidir. Bank sektoruna olan reputasiya zədələndisə, o zaman təhlükə qapını döyməyə başlayır. “Muğan Bank”da 106 milyon manat sığortalanmamış əmanətlərin həcmi də deməyə əsas verir ki, bankların fəaliyyətinə inamsızlıq bir az da artacaq”.

Nuray