“Muğan Bank ” 2023-cü ilin III rübü üzrə maliyyə hesabatlarını açıqlayıb. Valyuta.az banka istinadən xəbər verir ki, 2023-cü ilin yanvar-sentyabr ayları ərzində “Muğan Bank” 1 milyon 287 min manat zərər edib. Halbuki, bank 2022-ci ilin müvafiq dövründə 703 min manat xalis mənfəət açıqlamışdı. 

Hesabat dövründə bankın faiz gəlirləri 7.6% artaraq 31 milyon manat, faiz xərcləri isə 7.5% artaraq 27.7 milyon manat təşkil edib. Bu dövrdə bankın qeyri-faiz gəlirləri 21.3 milyon manata ( illik müqayisədə 36.9% az), qeyri-faiz xərcləri isə 25 milyon manata ( illik müqayisədə 4.9% çox) bərabər olub. Beləliklə, bank bu dövrdə 301 min manat əməliyyat zərəri edib.

Cari ilin oktyabrın 1-nə bankın aktivləri ilin əvvəli ilə müqayisədə 18.9% və ya 151 milyon 367 min manat azalaraq 647 milyon 971 min manata enib.  Cari ilin ilk 9 ayında “Muğan Bank ”ın kredit portfeli (müştərilərə verilmiş kreditlər) 1.4% və ya 6.3 milyon manat azalaraq 447.4 milyon manata çatıb. Bankın kredit portfelində istehlak kreditləri 46.1 milyon manat, biznes kreditləri 264.2 milyon manat, daşınmaz əmlak kreditləri isə 139.7 milyon manat təşkil edib.
Bu dövrdə “Muğan Bank ”ın cəmi öhdəlikləri 500.8 milyon manat təşkil edib ki, bu da ilin əvvəlinə nisbətən 29% və ya 205.2 milyon manat azdır. Bankın depozit portfeli də cari ilin ilk 9 ayında 34.4% və ya 169.2 milyon manat azalaraq 322 milyon 478 min manata çatıb.

2023-cü il oktyabr ayının 1-nə “Muğan Bank”ın cəmi kapitalı 57.8% və ya 53 milyon 899 min manat artaraq 147 milyon 79 min manat təşkil edib.

Qeyd edək ki, oktyabrın 17-dən etibarən Bankın ölkə üzrə bütün bankomatlarının fəaliyyətini müvəqqəti dayandırdığı bildirilib. Bank həmçinin, təminatlı nağd kredit verilişini dayandırıb.

Mahir