"Mərkəzi Bank məhkəmələrdə qanunsuz təmsil olunur. Onun iştirakı ilə olan məhkəmə prosesləri də qanunsuz keçirilir”.

Valyuta.az xəbər verir ki, bunu iqtisadçı ekspert Əkrəm Həsənov deyib.
 
Ekspert bildirib ki, Mərkəzi Bank məhkəmələrdə etibarnaməsiz təmsil olunur:

"Etibarnamə varsa belə, o, bir qayda olaraq, səlahiyyətsiz şəxs tərəfindən verilir. Mərkəzi Bank məhkəmələrə onun sədri Elman Rüstəmovun 1 dekabr 2020-ci il tarixli 101s saylı sərəncamından çıxarışı təqdim edir. Həmin sərəncamda deyilir ki, baş direktor Rəşad Orucovun Mərkəzi Bankı məhkəmələrdə təmsil etmək və etibarnamə vermək səlahiyyəti var. Halbuki, Mülki Prosessual Məcəllənin 73-cü maddəsinə əsasən nümayəndənin səlahiyyəti qanuna uyğun olaraq verilmiş və rəsmiləşdirilmiş etibarnamədə əks etdirilməlidir. Hüquqi şəxs adından etibarnamə onun rəhbərinin və ya təsis sənədlərinə əsasən buna səlahiyyəti olan digər şəxsin imzası ilə həmin hüquqi şəxsin möhürü vurulmaqla verilir.

"Azərbaycan Respublikasının Mərkəzi Bankı haqqında” Qanunun 24.2.1-ci maddəsinə əsasən  Mərkəzi Bankın sədri etibarnamə təqdim etmədən onu təmsil edir. Deməli, Mərkəzi Bankı etibarnaməsiz yalnız Elman Rüstəmov təmsil edə bilər. Digərlərinə də məhz o, etibarnamə verməlidir”.

Əkrəm Həsənov əlavə edib ki, Mərkəzi Bankın sədrinin sərəncamından çıxarış isə etibarnamə deyil:

"Əks halda məhkəmələrə təmsilçiliyi təsdiq edən buna bənzər digər sənədlər (əmək müqaviləsi, əmr və s.) də təqdim edilə bilərdi. Amma məhkəmələr həmişə etibarnamənin təqdim edilməsini tələb edir. O cümlədən hüquqi şəxslərdən. Buna görə də məhkəmələr Mərkəzi Bankın təmsilçiliyini qəbul etməməlidir. Mərkəzi Bankın bu formada verdiyi iddia ərizələri isə geri qaytarılmalıdır. Hazırda belə bir qanunsuz iddialardan birinin geri qaytarılması haqda məhkəməyə vəsatət vermişəm. Görək, nəticəsi necə olacaq. Vəsatətim təmin edilməsə (qanuna görə təmin edilməlidir!), belə çıxacaq ki, digər hüquqi şəxslərin təmsilçiləri də etibarnamə təqdim etməyə bilər. Əvəzində əmr, sərəncam, əmək müqaviləsi və s. ilə çıxış edə bilər. Başqa sözlə, etibarnamə institutu da devalvasiyaya məruz qalacaq...”