"Zoox"un həmtəsisçisi və texniki direktoru Cessi Levinson (Jesse Levinson) 2024-cü ildə keçirilən "TechCrunch Disrupt" tədbirində bildirib ki, "Tesla"nın gələn il Kaliforniyada (və ya hər hansı başqa yerdə) robotaksi xidməti istifadəyə verəcəyini düşünmür. 

Valyuta.Az xəbər verir ki, Levinsonun sözlərinə görə, “əsas problem onların işlək texnologiyaya malik olmamasıdır.”

Bununla belə, "Zoox" "Tesla"nın bəzi ən yaxşı mütəxəssisləri ilə maraqlanır. "Amazon"a məxsus "Zoox" bu həftənin əvvəlində "LinkedIn" platformasında paylaşım edərək, "Tesla"nın Avtopilot aparat mühəndisliyi komandasında rəhbər vəzifəsində çalışmış Canq Qaonu aparat mühəndisliyi üzrə direktor kimi işə qəbul etdiyini açıqlayıb. Canq Qaonun son 8 ilini "Tesla"da, ondan əvvəl isə 9 ilini "Apple" şirkətində keçirdiyi qeyd olunub.

Canq Qaonun "Tesla"dan ayrılması diqqətçəkən hadisədir. İlon Maskın (Elon Musk) rəhbərlik etdiyi elektrik avtomobili istehsalçısı hazırda sürücünün sükanı nəzarətdə saxlamasını və istənilən vaxt idarəetməni ələ almağa hazır olmasını tələb edən "Tam Avtonom Sürüş" proqramının insan nəzarəti olmadan işləyən versiyasını istifadəyə verməyi planlaşdırır.

Rəhim