Ötən ay Almaniyanın premium avtomobil istehsalçısı "BMW" üçüncü rübdə Çin satışlarının üçdə bir nisbətində azaldığını açıqlayıb.

Valyuta.Az-ın verdiyi xəbərə görə, bu barədə Yahoo Finance-ın dərc etdiyi məqalədə bəhs olunur.

"BMW" şirkəti çərşənbə günü üçüncü rüb üzrə mənfəətinin 61% azalaraq analitiklərin gözləntilərini doğrultmadığını, bunun Çin satışlarının azalması və əyləc problemləri ilə bağlı olduğunu bildirdi. Lakin şirkət ilin tam maliyyə proqnozuna uyğun irəlilədiyini vurğuladı.

"BMW"nin baş icraçı direktoru Oliver Zipse bəyanatında "Üçüncü rübdə qeyri-adi çətinliklərdən sonra dördüncü rübdə illik hədəflərimizi yerinə yetirmək və daha güclü gəlirə nail olmaq üçün yenidən yolumuza davam edirik," deyə qeyd edib.

Qeyd edək ki, "BMW" sentyabr ayında Çin bazarında zəif tələb və "Continental" tərəfindən təchiz olunan əyləc sistemindəki problemlər səbəbindən illik proqnozunu aşağı salmışdı.

"BMW" üçüncü rüb üçün əməliyyat mənfəətini 1.7 milyard avro (1.82 milyard dollar) olaraq açıqlayıb ki, bu da ötən il eyni dövrdəki 4.352 milyard avrodan 61% azdır. Analitiklər isə əməliyyat mənfəətinin 1.8 milyard avro olacağını gözləyirdilər.

Şirkətin gəlirləri ötən ilin eyni dövründəki 38.46 milyard avrodan 32.4 milyard avroya düşərək 15.7% azalıb və bu, analitiklərin gözləntiləri olan 34.3 milyard avronun altında olub.

"BMW" 2024-cü il üçün əməliyyat mənfəət marjını 6% ilə 7% arasında qoruyacağını bildirib.

Məqalədə həmçinin qeyd olunub ki, Almaniyanın digər avtomobil istehsalçıları olan "Volkswagen" və "Mercedes-Benz" də iqtisadiyyatın zəifləməsi və kəskin rəqabət fonunda Çin bazarında satışlarının azalması ilə mübarizə aparır.

Rəhim