İlon Maskın “Tesla” şirkəti Çinə idxal edilən və ya Çində istehsal olunan 1,6 milyondan çox avtomobili geri çağırır.

Yeniavaz.com xəbər verir ki, bu barədə Çin Xalq Respublikasının Bazara Nəzarət və Tənzimləmə üzrə Dövlət Komitəsi məlumat yayıb.

“Bu gündən etibarən “Tesla”nın 15 oktyabr 2020-ci il və 17 iyul 2024-cü il tarixləri arasında Çinə idxal edilmiş və ya Çində istehsal edilmiş 1 milyon 683 min 627 ədəd “Model S”, “Model X”, “Model 3” və “Model Y” elektrik avtomobilləri geri çağırılacaq”, - komitənin məlumatında bildirilib.

Məlumata görə, geri çağırılma onunla əlaqədardır ki, bu avtomobillərdəki sistem ön baqajın kilidinin açılmasını tanımaya və bu barədə sürücünü xəbərdar etməyə bilər. Nəticədə, avtomobil hərəkət edərkən baqaj açıla, sürücünün görüşünə mane ola və digər nəqliyyat vasitələri ilə toqquşma riskini artıra bilər.

Həmçinin, komitənin məlumatına görə, şirkətin lazımi tənzimləmələri məsafədən həyata keçirəcəyi gözlənilir.

Qeyd edək ki, 2003-cü ildə əsası qoyulan “Tesla Motors” elektrik avtomobilləri və müvafiq texnologiyalar hazırlayır və istehsal edir. Şirkətin baş ofisi Kaliforniyanın Palo Alto şəhərində yerləşir. Elektrikli avtomobillərlə yanaşı “Tesla” öz texnologiyasından istifadə edərək, akkumulyatorlar və elektrik mühərrikləri istehsal edir və onları “Toyota” və “Daimler” kimi digər avtomobil şirkətlərinə satır.