“Hər şeyin təzəsi daha yaxşıdır” deyimini çox işlətsək də, ikinci əl avtomobil almağa tərəddüd etməyənlərin sayı kifayət qədər çoxdur. Təbii ki ikinci əl avtomobil almaq daha sərfəlidir, bu da anlaşılandır. Bu, bəzi hallarda bu xeyrimizə olsa da, zərərlə də qarşılaşa bilirik. Yəqin ki ikinci əl avtomobil alıb “ustalarda qalan” tanışlarınız var. Onlar çox vaxt yanıldıqlarını deyirlər. Ümumiyyətlə, ikinci əl avtomobil alarkən nələrə diqqət edilməlidir ki, yanılmayaq?

Rəsmi servislərə üz tutun

Avtomobil təlimçisi Adil Nəbiyev Valyuta.az-a bu zaman avtomobili öz servisində yoxlatdırmağın vacibliyindən danışdı:

“İkinci əl avtomobil alanlar çox vaxt ya bazardan, ya da hansısa saytlardan yoxlatdırmadan alırlar. İkinci əl maşınları ümumiyyətlə, çox diqqətlə yoxlatdırmaq lazımdır. Hər avtomobili öz rəsmi servislərində yoxlatdırmaq daha yaxşıdır. Çünki hansısa ustanın yanına gedib yoxlatdıranda, bir çox hallarda bəzi hissələrdən başı çıxmaya bilər, amma rəsmi diller olanda, yazılı bütün detallar haqqında, hər hissəyə baxış keçirilir”. 

Satıcılar sizi aldada bilər

Adil Nəbiyev deyir ki, satıcılar maşın satılsın deyə ona əl gəzdirə bilərlər. Siz də maşını yoxlatdırmadan alsanız, maşının əla vəziyyətdə olduğunu görüb, aldana bilərsiniz:

“Mühərrik (motor) elə bil kəsilməmiş qarpızdır. Məsələn, satıcı maşını satmaq üçün alışdırma şamını (sveça) dəyişib, 95 benzin vurub, yağı dəyişə bilər. O zaman alıcı hiss etməyə bilər ki, mühərrik yaxşı işləyir, ya yox. Avtomobili işə salanda görürsən, yaxşı işləyir, usta da baxır deyir ki, yaxşıdır. Alıb bir az sürəndə görürsən ki, problem var. Avtomobildə artıq ən çox mühərrikdə yağ yemə məsələləri olur. Bəzi problemləri aşağı sürətdə, yaxud qısa müddət sürəndə, hiss etmək olmur. Bu kimi nüanslar çoxdur”.

İkinci əl, yoxsa yeni avtomobil?

Mütəxəssis taksi şirkətlərinin satışa çıxarılan maşınlarından da danışdı. Bu avtomobilləri aldığımız zaman isə daha çox zərərə düşə biləcəyimizi dedi:

“Bir var, öz şəxsi maşının ola, ona qulluq edəsən, sən bilmirsən də, nə vaxt satacaqsan, nə edəcəksən. Elə adamlar var ki, satdı, satmadı malına yaxşı qulluq edir. Amma sürücülər maşınlarını tez-tez ucuz qiymətə satışa çıxarırlar. Maşın taksi kimi işlənib, “probeq”i bəlkə də 500 000 – 1 000 000 kilometrdir. “Probeq”ni dəyişirlər, onu da hər servis bilmir, ancaq rəsmi servislər bilir. Həmin avtomobili də yeni başlayan həvəsli adam alır, sonra da problemlər başlayır”.

A.Nəbiyev sonda qeyd etdi ki, yeni avtomobil almaq daha yaxşı olar: “Təbii ki maddi məsələlərdən dolayı ikinci ən avtomobil alınır. Ancaq problemli avtomobil alanda, ustalara o qədər çox pul xərclənir ki, yenisi alsa, daha ucuz başa gələrdi. Ona görə də, hər şeyin yenisi daha gözəldir”.

Nuray