Zaqatala Rayon İcra Hakimiyyəti “İstehsal Təmir Sahəsi” MMC ilə maliyyə dəyəri 11 103.6 AZN olan müqavilə imzalayıb. 

Valyuta.Az hit.az-a istinadla xəbər verir ki, müqavilədə Zaqatala şəhər 12 saylı körpələr evi-uşaq bağçasının böyük qrup otaqlarının təmiri işlərinin satin alınması nəzərdə tutulur.

“İstehsal Təmir Sahəsi” MMC 22 oktyabr 2001-ci il tarixdə dövlət qeydiyyatına alınıb.

Nizamnamı kapitalı 10 AZN-dir. Hüquqi ünvanı Zaqatala rayonu, Zaqatala şəhərində yerləşən MMC-nin qanuni təmsilçisi Şitayev Məmməd Şəmsəddin oğludur. 

Şirkət bundan əvvəl Zaqatala Rayon İcra Hakimiyyətinin inzibati binasında cari təmir işləri həyata keçirib. Bunun müqabilində MMC-yə 17 239.8 AZN ödənilib.

Araşdırmalar göstərir ki, “İstehsal Təmir Sahəsi” MMC əsasən Zaqatala və Balakən rayonlarının yerli qurumlarının keçirdiyi satınalma müsabiqələrinin qalibi olub. Bu da təsadüfi deyil. İddialara görə, MMC Zaqatalanın icra başçısı Mübariz Əhmədzadənin nəzarətindədir. 

Mübariz Əhmədzadə 2009-cu ildən Zaqatalanın icra başçısıdır. Bundan əvvəl 2 il Qax rayonuna rəhbərlik edib. O, Meliorasiya və Su Təsərrüfatı ASC-nin keçmiş sədri Əhməd Əhmədzadənin qardaşıdır. Əhməd Əhmədzadə 1993-cü ildən meliorasiya və su təsərrüfatına rəhbərlik edirdi. Prezident İlham Əliyevin 2 aprel 2021-ci il tarixli sərəncamı ilə vəzifəsindən azad edilib. Əhməd Əhmədzadə oliqarx məmurlardan hesab edilir. Yaxın çevrəsində onu “Baron” ayaması ilə tanınır.