“Azərbaycandakı təbii iqlim şəraiti orqanik məhsulların yetişdirilməsinə tam imkan verir”.

Bunu Azərbaycanın Qida Təhlükəsizliyi Agentliyin sədr müşaviri Camal Quliyev deyib.

O bildirib ki, bu gün dünya miqyasında orqanik məhsullara tələbat günü-gündən artır və bəzən bunlar ənənəvi məhsullardan dəfələrlə baha qiymətə satılır:

“Artıq Azərbaycandan da pambıq məhsulu, bal və digər orqanik məhsullar xaricə ixrac edilir. Təbii ki, orqanik məhsulların istehsalı ilə bağlı tələblər mövcuddur. Orqanik məhsulların özünün sertifikatlaşdırma sistemi var. Ölkəmizdə bu sertifikatlaşdırma sisteminin və qanunvericilik bazasının yaradılması istiqamətində işlər aparılır. Sahibkarlarımız da bu sahəyə diqqət ayırmalıdırlar”. 

Onun sözlərinə görə, hələ uzun müddət dünya bazarında orqanik məhsulların satışı ilə bağlı rəqabət aparacaq tərəflər olmayacaq:

“Sahibkarlar bazardakı boşluqdan istifadə edərək orqanik məhsul istehsalına daha çox diqqəti ayırmalıdırlar. Bu, həmin sahənin sürətli inkişafına səbəb ola bilər”.