Yapon avtomobil şirkəti "Mitsubishi Motors Corporation" Rusiya avtomobil bazarını tərk etmək niyyətində deyil, üstəlik, Rusiyada əməliyyat fəaliyyətinə qayıtmağı planlaşdırır. 

Valyuta.az xəbər verir ki, bu barədə Auto.mail.ru məlumat yayıb. 

Qeyd olunur ki, rus dilerləri "Mitsubishi Motors Corporation" rəhbərliyi ilə danışıblar. Görüş zamanı şirkət rəhbərliyi Rusiya tərəfini əmin edib ki, onlar nümayəndəliyin hazırkı "yuxu" rejimini saxlamaq niyyətindədirlər, lakin şirkət yalnız Yaponiya və Rusiya arasında xarici siyasətdə vəziyyət dəyişdikdən sonra işə qayıda biləcək.

Bundan əvvəl "Mitsubishi" yeni "Mitsubishi Outlander PHEV" hibrid krossoveri haqqında məlumat açıqlamışdı. Avtomobil Yaponiyada bu payızda peyda olacaq və 2025-ci ildə Avropa bazarına çıxacaq.

Yeniləmə çərçivəsində krossover güc ehtiyatı artırılmış yeni akkumulyator alıb. Yenidən doldurulan "Outlander" təkcə elektrik enerjisi ilə 80 km məsafə qət edə bilir. Həmçinin, avtomobilin idarəetməsini yaxşılaşdırmaq üçün yapon şirkətinin mühəndisləri tam ötürücü sistemini, asqısını modifikasiya edib və yeni təkərlərdən istifadə ediblər.

Avtomobil 12 düymlük displeyə və havalandırılan oturacaqlara malik yeni media sistemi alıb. Outlander audio sistemi Yamaha ilə əməkdaşlıqda hazırlanıb.

Paşa Məmmədli