Kənd təsərrüfatı naziri Məcnun Məmmədov Dövlət Toxum Fondunda gedən ixtisarlar, Fondun ləğv olunacağı ilə bağlı yayılan məlumatlara reaksiya verməkdən yayınır.  

Valyuta.az xəbər verir ki, ötən gün Bakıda keçirilən Beynəlxalq Sığortaçılıq Forumunda mövcud durumla bağlı nazirə sual ünvanlansa da, o heç bir reaksiya verməyib. Köməkçisi naziri bu durumdan çıxarıb və bildirib ki, növbəti tədbirə tələsirlər. 

Qeyd edək ki, bu ilin mart ayından etibadən Kənd Təsərrüfatı Nazirliyinin tabeliyində fəaliyyət göstərən Dövlət Toxum Fondunda kütləvi ixtisarlar aparılır. Fondun sədri işdən çıxıb, digər əməkdaşlardan isə işdən çıxarılmaqları ilə bağlı ərizə yazılması tələb edilib. Fondun əməkdaşlarına məlumat verilib ki, artıq Dövlət Toxum Fondu fəaliyyətini dayandırır.

Mediada yayılan məlumatlara görə, Fondun 80-dən çox işçisi 3 aydan çoxdur ki, maaşlarını ala bilmir. 

Xatırladaq ki, Dövlət Toxum Fondu Azərbaycan Prezidentinin 2015-ci il 2 mart tarixli 1081 nömrəli Sərəncamına əsasən yüksək məhsuldar toxumların istehsal və tədarükünün həyata keçirilməsi məqsədilə yaradılıb. Fondun tabeliyində 5 toxum emalı zavodu fəaliyyət göstərir.

Pünhan