Şakir Rəhimov və Tariyel İsmayılov "Bank Respublika"dan nə qədər qazanır? - RƏQƏMLƏR

“Bank Respublika”nın rəhbərliyi 2025-ci ilin ilk yarısında bankdan 8,2 milyon manat gəlir əldə edib.

Valyuta.az xəbər verir ki, bu da 2024-cü ilin eyni dövrünə nisbətən 2,5 dəfə və ya 5 milyon manat çoxdur. Belə ki, 2024-cü ilin ilk yarısında bankın rəhbərliyinin gəlirləri 3,23 milyon manat təşkil edib. 

Bu ilin ilk yarısında ödənişlərin 7,11 milyon manatı əməkhaqqı və bonuslar, 1,08 milyon manatı isə pensiya və digər ayırmalardır. Ötən ilin eyni dövründə bu rəqəm müvafiq olaraq 2,79 milyon manat və 443 min manat təşkil edib.

Qeyd edək ki, bu məbləğə Müşahidə Şurasının və İdarə Heyətinin üzvləri ilə bağlı nağd və nağdsız ödənişlər daxildir.

Hazırda bankın Müşahidə Şurasında 7, İdarə Heyətində isə 3 nəfər təmsil olunur.

Beynəlxalq və yerli tərcübəyə əsasən bankların İdarə Heyəti Müşahidə Şurasına nisbətən 2 dəfə daha çox, İdarə Heyəti sədri İH üzvlərindən 1,5 dəfə, MŞ sədri isə MŞ üzvlərindən 1,2 dəfə çox əməkhaqqı alır.

Hazırda “Bank Respublika”nın Müşahidə Şurasının sədri Şakir Rəhimov (səhmdar), üzvləri Yohannes Meynhardt, İrina Şmidt, Elçin Quliyev (səhmdar), Antoine Hurpin, Shavkat Akmalov və Steffan Karstendir. Bankın İdarə Heyətinin sədri Tariyel İsmayılov, sədr müavinləri - Elnur Həsənov və Aslan Abasovdur. Bu isə o deməkdir ki, Bankın İdarə Heyətinin sədrinin 6 aylıq gəliri təxminən 2 milyon manat, İH üzvlərinin gəlirləri 1,3 milyon manat, Müşahidə Şurasının sədrinin gəlirləri 780 min manat, MŞ üzvlərinin gəlirləri isə 650 min manat təşkil edib. Bu isə ötən ilin eyni dövrünə nisbətən 2 dəfədən çox artım deməkdir. 

Xatırladaq ki, "Bank Respublika" ASC 1992-ci ildə yaradılıb. Bankın səhmlərinin 90,25% Quliyev qardaşlarına (63,32%-i Quliyev Natiq Saday oğlu, 18,46%-i qardaşı Elçin Quliyevə, 8,47%-i Namiq Quliyevə), 5,45%-i bankın Müşahidə Şurasının sədri Şakir Rəhimova, 4,22%-i "Sparkassen International Development Trust"a, 0,08%-i isə digər səhmdarlara aiddir.

Nara