Dünya ərzaq qiymətləri son 8 ayda ən yüksək aylıq artış səviyyəsinə çatıb

BMT-nin Qida və Kənd Təsərrüfatı Təşkilatının (FAO) son 8 ayda dünyada ərzaq qiymətlərinin kəskin bahalaşması ilə bağlı məlumat yayıb.

FAO-nun Azərbaycandakı Tərəfdaşlıq və Əlaqələndirmə Ofisindən Valyuta.az-a daxil olan məlumatda bildirilir ki, BMT-nin Qida və Kənd Təsərrüfatı Təşkilatının (FAO) Ərzaq Qiymətləri İndeksinin 2021-ci ilin yanvar ayına olan aylıq hesabatına əsasən ərzaq məhsullarının beynəlxalq qiymətləri 2020-ci ilin dekabr ayı ilə müqayisədə 14,3 % artıb.

Bildirilir ki, dünya ərzaq qiymətləri son 8 ayda yüksəlməklə bərabər 2014-cü ilin iyul ayından indiyədək ən yüksək aylıq artış səviyyəsinə çatıb. Bununla yanaşı, dünya miqyasında taxıl ehtiyatlarında isə kəskin azalma müşahidə olunub.

Qlobal olaraq 2020/21-ci illərdə taxıl istehlakının əvvəlki mövsümə nisbətən 52 milyon ton artaraq 2 761 milyon ton səviyyəsində olacağı proqnozlaşdırılır. Buğda və düyünün dünya üzrə istehlakının il ərzində müvafiq olaraq 0,7 % və 1,8 % artacağı proqnozlaşdırılır. Həmçinin, dənli bitkilərin qlobal ehtiyatlarının 2,2 % azalaraq 801 milyon tona enəcəyi gözlənilir, bu isə son beş ildəki ən aşağı göstəricidir.

Valyuta.az