Apple şirkəti bu il iPhone 16 smartfon seriyasını təqdim edəcək. İndi isə insayderlər bu seriyaya daxil olacaq bütün iPhone 16 modellərinin əks olunduqları fotonu təqdim ediblər. Təqdim edilmiş fotoda smartfonların maketlərinin arxa hissələri əks olunub. Fotoda dörd iPhone 16 modelini görmək olar. iPhone 16, iPhone 16 Plus, iPhone 16 Pro və iPhone 16 Pro Max. Sözügedən foto smartfonların ölçülərinə nəzər yetirməyə və onların xarici görünüşlərini müqayisə etməyə imkan verir. Beləliklə fotodan da görmək olar ki, iPhone 16 Pro və iPhone 16 Pro Max modellərinin ölçülərində böyümə olacaq.

     Fotoda qeyd edilib ki, iPhone 16 Pro modeli 6.3 düym, iPhone 16 Pro Max modeli isə 6.9 düym ekranla təchiz olunacaq. Müqayisə üçün qeyd etmək lazımdır ki, keçən ilki iPhone 15 Pro modeli 6.1 düym, iPhone 15 Pro Max modeli isə 6.7 düym ekrana sahibdir. iPhone 16 və iPhone 16 Plus modellərinə gəldikdə isə onların ölçüləri keçən ilki iPhone 15 və iPhone 15 Plus-ın ölçüləri ilə eyni olacaq. Yəni adi iPhone 16 modeli 6.1 düym ekranla, iPhone 16 Plus modeli isə 6.7 düym ekranla təchiz olunacaq.  Bununla yanaşı fotodan da görmək olar ki, iPhone 16 və iPhone 16 Plus modellərində arxa kameralar şaquli vəziyyətdə yerləşəcəklər. Qeyd etmək lazımdır ki, iPhone 16 smartfon seriyası sentyabr ayında təqdim olunmalıdır.

© technote.az