Yanvar ayında Azərbaycana gətirilən yalnız elektrik mühərriklə hərəkətə gətirilən nəqliyyat vasitələrinin sayı 239 olub.

Valyuta.az Dövlət Gömrük Komitəsinə istinadən xəbər verir ki, bu avtomobillərə 9 milyon 663 min ABŞ dolları xərclənib. Yanvar ayında ölkəyə gətirilən elektromobillər keçən ilin eyni dövrü ilə müqayisədə 120 ədəd (100.8%), dəyər ifadəsi ilə 4 milyon 726 min ABŞ dolları (95.7%) çoxdur.

Ötən ilin yanvar ayında Azərbaycana 119 ədəd yalnız elektrik mühərriklə hərəkətə gətirilən nəqliyyat vasitələri gətirilib ki, bu avtomobillərin dəyəri 4 milyon 937 min ABŞ dolları təşkil edib.

Qeyd edək ki, yanvar ayında ölkəyə avtomobil idxalının ümumi sayı 6 min 191 olub ki, bu da 2023-cü ilin eyni ayı ilə müqayisədə 690 ədəd azdır. Ötən ilin yanvar ayında bu say 6 min 881 ədəd olub.

Əvəz Həsənov