Alimlər müəyyən ediblər ki, hominid quyruqları 25 milyon il əvvəl tək bir genetik dəyişiklik nəticəsində yoxa çıxmış ola bilər.

Valyuta.az xəbər verir ki, ABŞ - nın Nyu York Universitetinin (NYU) tədqiqatçıları müxtəlif meymun növlərinin DNT-lərini hominid növləri ilə müqayisə ediblər. Tədqiqatlar meymunlarda olmayan, hominidlərdə mövcud olan genetik variantlara baxıb. "Nature" elmi jurnalında dərc edilən araşdırmada TBXT adlı genin bir çox primatlarda quyruq əmələ gəlməsindən məsul olduğu bildirilib. Araşdırmada "Alu" adlı elementin transpozonlarının bu genə daxil olması ilə quyruğun əmələ gəlməsi prosesinin dayandığı bildirilib.

"Transpozon"lar, "transpozisiya" deyilən bir proses vasitəsilə hüceyrənin genində müxtəlif yerlərə hərəkət edə bilən "atlanan genlər" kimi də tanınan DNT ardıcıllığıdır.

Tədqiqatçılar siçanlar üzərində də təcrübələr aparıblar. İnsanabənzər TBXT geninin nəql edildiyi siçanların qısa quyruqla və ya quyruqsuz doğulduğu müşahidə edilib. Bu siçanların körpələrdə görülən sinir borusu defektini (NTD) inkişaf etdirdiyi də bildirilib. Körpələrdə ən çox rast gəlinən NTD, parçalanmış onurğa xəstəliyi olaraq da bilinən "spina bifida"dır. Bu xəstəlikdə onurğa sütununu təşkil edən sümüklər onurğa beynini tam örtmədiyi üçün onunla əlaqəli sinirlər açıq qalır.

Elmir