"Azərbaycanda vergi və gömrük ödənişlərinin kredit kartları vasitəsi ilə ödənilməsi təcrübəsi tətbiq olunmur. Bu da bəzi kritik məqamlarda sahibkarların işini ləngidir". 

Valyuta.az xəbər verir ki, məsələnin çevik həll olunması üçün iqtisadçı Fərhad Hüseynli tətkliflərini səsləndirib. 

Mütəxəssis, sahibkarlara korparativ kredit kartlarının verilməsini məqbul sayıb: “Bəzən olur ki, sahibkarın qısa vaxtda gömrüyə və ya vergiyə ödəniş etməsi, gömrük əməliyyatını, gömrük rüsumunu, ƏDV-ni ödəmək və s. əməliyyatları həyata keçirmək üçün ekspress kreditə, pul vəsaitinə ehtiyacı yaranır. Lakin sahibkarın yetərli vəsaiti olmadığı halda fəaliyyətində ləngimələr, axsamalar qaçılmaz olur. Bununla əlaqədar olaraq, sahibkarlar üçün mövcud kredit xətlərinin açılması, banklar tərəfindən biznes analizlər edilməsi şərti ilə uyğun olan şəxslərə korporativ kredit kartlarının verilməsi mümkündür. Bu, həm sahibkarlar, həm də banklar üçün effektli mexanizm olar”.

F. Hüseynli hesab edir ki, qısa müddət ərzində - 30-40 günlük kreditdən istifadənin faizsiz olması şərti ilə, yaxud da uzunmüddətli aşağı faizli kredit limitlərinin təklif edilməsi, ödənişlərin isə taksitlə (hissə-hissə) geri qaytarılması sahibkarlar üçün əlverişli alətə çevrilə bilər.  

İqtisadçı, borclu vergi ödəyicilərinin bank hesablarına qoyulan sərəncamların daha tez götürülməsi üçün qanunvericilikdə dəyişiklik edilməsini təklif edib. Bunun üçün borcun hissə-hissə ödənilməsinin tətbiq olunmasını vacib sayıb:  “Qanunvericilikdə dəyişiklik etməklə borclu vergi ödəyicilərinin borclarının rəsmi müraciət əsasında vergi orqanı qarşısında rəsmi öhdəliklər götürmək şərti ilə borcun strukturunu yenidən müəyyənləşdirmək olar. Ödənişlərin hissə-hissə ödənilməsinə qaydalar çərçivəsində razılıq aldıqdan sonra, hətta hesablanmış faizlərin 80-90 faizinin silinməsi yolu ilə sahibkarın bank hesabına qoyulan sərəncamların aradan qaldırılmasıyla sahibkarlara ciddi dəstək verilmiş olar”. 

Qeyd edək ki, banklar sahibkarlıq subyektlərində əməliyyatlar üzrə hesabatlılığının, şəffaflığının az olmasını, "qara mühasibatlıq"la əlaqədar narazılıqları olduğunu tez-tez səsləndirirlər. Son dövrlər isə rəsmiləşdirilən əməliyyatların artdığını, vergi ödəyicilərinin əməliyyatlarının başlanğıcı, gedişatı və sonunun izlənmə imkanının olduğunu müşahidə etmək mümkündür. Bu baxımdan F.Hüseynli  "ağ mühasibatlığa" keçid şəraitində bankların da bu məsələlərdə daha maraqlı olacağı qənaətindədir. 

Zeynəb Vəkil 
Valyuta.Az