Beynəlxalq Kosmik Stansiyadan (BKS) kosmosa göndərildiyi güman edilən parça ABŞ-ın Florida ştatında bir evin üzərinə düşüb.

Valyuta.az xəbər verir ki, sözügedən evin sahibi Alexandro Otero, ailəsinin yaşadıqlarından danışarkən, həmin vaxt tətildə olduğunu söyləyib. Zərərçəkən, "Onlar inanılmaz bir səs eşitdilər. Az qala oğluma dəyəcəkdi. Parça tavanda və döşəmədə deşik açdı" - deyib.

NASA-nın verdiyi açıqlamada martın səkkizində baş verən hadisə ilə bağlı araşdırmaya başlanıldığı açıqlanıb. NASA sözçüsü Coş Finç, təxminən bir kiloqram ağırlığında olan parçanın haradan gəldiyini müəyyənləşdirmək üçün Floridadakı Kennedi Kosmik Mərkəzində araşdırma apardıqlarını söylədi. Otero martın 15-də “X” hesabı vasitəsilə evin üstünə düşən parçanın şəklini də paylaşıb. Britaniyalı astrofizik Conatan Makdovell bildirib ki, parça BKS-in batareyasını dəyişdirmək üçün istifadə edilən 2,6 tonluq avadanlıqdan qopub düşmüş ola bilər.

EP-9 adlanan akkumulyator paleti BKS-də doqquz tükənmiş batareyadan ibarət idi. Batareyanın dəyişdirilməsindən sonra bu hissələrin idarə olunan şəkildə Yerə qaytarılması planlaşdırılırdı. Bununla belə, bəzi nasazlıqlar səbəbindən batareyalar qrafik üzrə göndərilə bilmədiyi üçün, NASA 2021-ci ilin martında onu orbitdən sərbəst düşməsi üçün BKS-dən ayırıb.
 
Otero, evinə dəyən zərərin ödənilməsi üçün səlahiyyətlilərdən xəbər gözlədiyini bildirdi. Missisipi Universitetindən Mişel Hanlon zərərin ödənilməsi prosesinin mürəkkəb ola biləcəyini deyib. Akademik bildirib ki, həmin hissənin xarici mənşəli olduğu müəyyənləşərsə, dəymiş ziyan istehsalçı ölkə tərəfindən ödənilməlidir. Populyar elmi sayt olan “Ars Technica”nın məlumatına görə, akkumulyatorlar NASA-ya məxsusdur, lakin həmin hissənin BKS-dən ayrılmasına imkan verən mexanizm Yaponiya tərəfindən istehsal edilib.

Elmir