Bu gün hökuməti narahat edən məsələlərdən biri inflyasiya ilə bağlıdır. Prezident İlham Əliyevin də bu istiqamətdə hökumətə xüsusi tapşırıqları olub.

Valyuta.az xəbər verir ki, bunu maliyyə naziri Samir Şərifov Milli Məclisin Gənclər və idman, Əmək və sosial siyasət, Aqrar siyasət, Regional məsələlər, Təbii ehtiyatlar, energetika və ekologiya komitələrinin birgə iclasında "2024-cü il üçün büdcə Zərfi"nin müzakirəsi zamanı deyib.

Nazir bildirib ki, car ildə inflyasiyanın bir qədər səngiməsi müşahidə edilir: “İlin sonunda inflyasiyanın artıq birrəqəmli olması gözlənilir. Gələn ildə isə inflyasiyanın cari nəticələrlə müqayisədə yarıbayarı olması gözlənilir. Təqribən söhbət 5,3 % inflyasiyadan gedir. Ona görə də bu istiqamətdə işlər gedir. Azərbaycanda inflyasiyanı yaradan faktorlar da var, böyük hissəsi isə xarici faktorlar idi. İndi isə xarici bazarlarda dəyişikliklər baş verir. İdxal inflyasiyanın da enməsi nəticəsində bizdə bu proseslər sabitləşəcək. Dövlət tərəfindən də həmin təsirlərin o cümlədən sosial sahədə yumşaldılması istiqamətində bir sıra addımlar atılıb. Bu gün təqdim etdiyimiz büdcədə əsasən sosial istiqamətdə əhaliyə ödənişlərin edilməsi nəzərdə tutulur”.