“Qış parkı”nda yerləşən avtodayanacaqlarda fərdi avtomobillər üçün yeni parkinq tarifləri müəyyənləşib. Digər paketlərin qiyməti ilə bərabər 24 saatlıq aylıq paketin qiyməti də iki dəfə bahalaşıb. Yeni tarifə əsasən, parkinq haqqı 60 manatdan 120 manata qədər artırılıb.

Ümumiyyətlə, parkinq qiymətlərinin bu qədər artması nə dərəcədə doğru qərardır? Əhalinin gəliri bu qiymətlərin kəskin artmasına imkan verirmi? 

Bu barədə Valyuta.az-a danışan iqtisadçı Eldəniz Əmirov bildirib ki, təbii olaraq qiymətlərlə bağlı zonalar üzrə diferensial qiymətlərin müəyyən edilməsi doğru olsa da, mərkəzi hissələrdə olan qiymətlər kifayət qədər yüksəkdir:

“Ölkədə insanların gəlirlərini, mövcud iqtisadi göstəriciləri nəzərə alsaq, qiymətlər kifayət qədər çoxdur. Amma bununla belə yenə də tələb olduğunu, parkinqlərin boş qalmadığını, tıxaclar və saxlanma yerləri ilə bağlı çatışmazlıq olduğunu nəzərə alaq. Görünür ki, mövcud stiuasiyada bu parkinqlərin baha dediyimiz qiymətlərlə də belə istifadə etməyə hazır olan sürücülərimiz var. Yəni, bu birmənalı olaraq rastlaşdığımız reallıqdır. Amma bütün hallarda sürücülər, avtomobil sahibləri, bu qiymətləri qəbul edərək parkinq xidmətlərindən istifadə edirlərsə, bu, o demək deyil ki, davamlı olaraq qiymətlər artırılmalıdır. Bu yanaşma doğru deyil, nizamlı qiymətin tətbiq edilməsi vacibdir. Bütün hallarda iş yeri və yaşayış yeri parklanma zonasının yaxınlığında yerləşən insanlara münasibətdə bu məsələ tənzimlənməlidir. Həmin insanlar bu qiymət siyasətindən əziyyət çəkməməlidirlər".

"Digər tərəfdən Bakı şəhərində parkinq qiymətləri ilə bağlı verilmiş qərar həm də yollarda tıxacın tənzimlənməsinə yönəlmiş qərardır” - deyə iqtisadçı qeyd etdi.

Əvəz Həsənov