Artıq kriptovalyuta bir investisiya aktivinə çevrilib. İnsanlar ona yatırım edərək gələcəkdə qiymət artımlarından faydalanmağı hədəfləyirlər.

Artıq bir çox ölkələrdə, o cümlədən Azərbaycanda kriptovalyutalarla aparılan əməliyyatlardan əldə edilən gəlirlər vergiyə cəlb olunur.

Dövlət Vergi Xidmətindən verilən məlumata əsasən, kriptovalyuta üzrə əməliyyatlardan gəlir əldə edən fiziki şəxslər vergi orqanlarında uçota alınmaqla VÖEN əldə etməlidir. Onların əldə etdikləri gəlirdən 14 faiz dərəcə ilə gəlir vergisi hesablayaraq növbəti ilin mart ayının 31-dən gec olmayaraq “Gəlir vergisinin bəyannaməsi”ni vergi orqanına təqdim etməklə dövlət büdcəsinə ödənilməlidir.

Eyni zamanda banklar da bu vəsaitlərdən vergi tutur. Xidmətdən bildiriblər ki, Azərbaycanın rezidentləri qeyri-rezident şəxslərə məxsus elektron pul kisəsində yaradılan hesaba pul köçürərkən, əməliyyatı həyata keçirən yerli bank, xarici bankın Azərbaycan Respublikasındakı filialı və ya poçt rabitəsinin milli operatoru köçürülən məbləğin 10 faizi miqdarında ödəmə mənbəyində vergi tutur.

Qeyd edək ki, Vergi Məcəlləsinin 99.3.8-ci maddəsinə əsasən, vergi ödəyicisinin aktivlərinin ilkin qiymətinin artdığını göstərən hər hansı digər gəlir (əmək haqqından başqa) qeyri-sahibkarlıq fəaliyyətindən əldə olunan gəlir sayılır.

Tutaq ki, fiziki şəxs 100 dollar ödəniş edib kriptovalyuta alır. Daha sonra həmin kriptovalyutanın dəyəri 300 dollara qədər artır. Bu zaman vergilər belə hesablanır:

Ödəmə mənbəyində vergi: (100: 0.9) x 10% = 11 dollar (18,7 manat)
Gəlir vergisi: 300-100 = 200 dollar
200 x 14% = 28 dollar (47,6 manat)

Deməli, bu halda fiziki şəxs bu əməliyyata görə ümumilikdə 66,3 manat vergi ödəməli olacaq.//İndex.az