Azərbaycanda sahibkarlıq subyektlərinin yoxlanılmasına moratoriumun tətbiq edildiyi 2015-ci ilin noyabr ayından 2021-ci il yanvarın 1-dək 19,4 min yoxlama aparılıb. 

Valyuta.az “İnterfaks-Azərbaycan” agentliyinə istinadən xəbər verir ki, bu barədə hökumətin 2020-ci ilə dair hesabatında deyilir.

“Sahibkarlıq sahəsində yoxlamaların dayandırılması haqqında” qanunun qəbul edildiyi vaxtdan keçən 62 ay ərzində cəmi 19,4 min yoxlama aparılıb (vergi yoxlamaları istisna olmaqla) ki, bunun da 17,1 mini 2020-ci ili əhatə edib”, - deyə hesabatda bildirilir.

Hesabatda müqayisə üçün qeyd edilir ki, əvvəlki 62 ay ərzində (2010-2015-ci illər) yoxlamaların sayı 260 min olub.

Qeyd edək ki, Milli Məclis martın 9-da keçirilən plenar iclasda qanunvericilikdə sahibkarlıq subyektlərinin yoxlanılmasına qoyulan moratoriumun müddətinin 1 yanvar 2022-ci il tarixinədək uzadılmasını nəzərdə tutan dəyişiklikləri qəbul edib.

Bu, “Sahibkarlıq sahəsində aparılan yoxlamaların dayandırılması haqqında” Qanunda edilən dəyişikliklərdə nəzərdə tutulub.

Prezident İlham Əliyev 2015-ci il oktyabrın 26-da sahibkarlıq sahəsində yoxlamaların 2015-ci il noyabrın 1-dən iki il müddətinə dayandırılmasını nəzərdə tutan qanun imzalayıb. 2017-ci ilin noyabr ayında bu moratorium 2021-ci il yanvarın 1-dək uzadılıb.

Qanuna əsasən, yalnız vergi yoxlamaları, insanların həyat və sağlamlığına, dövlətin təhlükəsizliyinə və iqtisadi maraqlarına mühüm təhlükə yaradan hallar üzrə siyahısı müvafiq icra hakimiyyəti orqanı tərəfindən müəyyən edilən yoxlamalar və maliyyə bazarı subyektlərində yoxlamalar, habelə tikintiyə və özəl tibb müəssisələrinin fəaliyyətinə dövlət nəzarəti çərçivəsində yoxlamalar aparıla bilər.*