“Ola bilər ki, həmin böyük saytların da məlumatları oğurlanır, ona görə də insanların kartları ələ keçirilir”.

Bu sözləri Valyuta.az-a bank məsələləri üzrə ekspert Əkrəm Həsənov böyük saytlardan alış-veriş edən zaman qeydiyyatdan keçirdiyimiz kartlarda olan pulların oğurlanmasının səbəbləri haqqında danışarkən deyib. 

“Bu problemin qarşısını necə almaq olar” sualına cavab verən ekspert bildirib ki, belə saytlardan alış-veriş edən şəxslərin ən azı iki kartı olmalıdır:

“Onlar bu kartlardan birində əsas pullarını saxlamalıdırlar. Alış-veriş edəndə isə həmin əsas kartdan digərinə lazım olan məbləği köçürməlidir. Lakin bu kartların hər ikisini də eyni bankdan almaq lazımdır ki, pul köçürmələri zaman da əlavə faiz çıxılmasın”. 

“Əmək haqqınızın köçürüldüyü kartları heç bir yerdə qeydiyyatdan keçirməyin”, deyə ekspert əlavə edib.

Bu prosesdə bankların üzərinə düşən məsuliyyət haqqında danışan Əkrəm Həsənov bildirib ki, əgər məlumat sizdən çıxıbsa, yəni kartı özünüz qeydiyyatdan keçirmisinzsə, bankın bu məsələdə heç bir məsuliyyəti yoxdur.

Davud