Biznes adamları hansı sahəyə tələbin daha çox olduğunu müşahidə edirlərsə, artıq o sahəni araşdırmağa başlayırlar. Çünki tələb nə qədər çox olarsa, biznesin uğurlu olma ehtimalı da o qədər artır. Son illər Azərbaycanda kofe içənlərin sayı artır və hazırda Azərbaycan bazarında daha çox biznes qurulan istiqamətlərdən biri də kofe məkanları - kofeşoplardır. Bəlkə mən də kofeşop açım? - sualı ətrafında düşünən şəxslər ola bilər. Bəs kofeşop biznesinə başlamaq istəyənlər hansı prosesdən keçməlidirlər? Bu biznesə başlamaq üçün əlimizdə nə qədər vəsait olmalıdır?

“Kassanın alınması 1 aya qədər çəkə bilir”

Kofeşop idarəçisi Kamil Manafov öz keçdiyi biznes prosesini Valyuta.az-la bölüşüb: “Hansısa biznesə başlayırsansa, müəssisəni fiziki, yaxud hüquqi şəxs kimi aça bilərsən. Kofeşop da həmçinin. Fiziki şəxs kimi təbii ki, daha rahatdır. Çünki bu halda pulu nağdlaşdırma məsələləri daha rahat olur. Əgər böyük biznes deyilsə, kiçik bir kofeşop açırsınızsa, fiziki şəxs kimi açaraq başlamaq lazımdır. Onun üçün ilk olaraq VÖEN, sonra, VÖEN-ə bağlı bank hesabı açılır. Sonra məkanla icarə müqaviləsi bağlamaq, obyekt adı almaq lazımdır. Daha sonra POS terminal və kassa sifariş edilməlidir. Kassanın alınması 1 aya qədər çəkə bilir. Çünki hər bankın öz şərtləri var. Əgər məkanınızda şirniyyat tipli məhsullar da hazırlanacaqsa, bunun üçün Qida Təhlükəsizliyi Agentliyindən sertifikat almaq lazımdır. Gəlib yoxlayırlar, hər şey qaydasındadırsa, problem olmur. Təxminən 1 həftəyə hazır olur”.

Kofe aparatlarının qiyməti...

Kamil Manafov kofeşop açmaq üçün biznes adamının xərclərindən də danışdı: “Büdcə məsələsi fərdi xarakter daşıyır. Kofe aparatlarının qiyməti 4-5 min manatdan 100 min manata kimi olur. Böyük brendlər daha bahalı aparatlar istifadə edirlər, yeni başlayanlar isə daha ucuz. O, baristanın rahatlığını təmin edir, kofenin dadına o qədər də təsir eləmir. Yəni 10 minlik aparat da işi görür. Kofeşopun aylıq xərcləri kifayət qədərdir. Daima desertlər, siroplar, kofe stəkanları alınmalıdır. Hər ay sabit xərclər olur, işçilərin maaşı, kommunal ödənişlər və s. Bunlar ayda təxminən 3 000 manat edir. Digər xərclər isə gəlirinizə bağlıdır. Nə qədər kofe, desert və s. satılacaqsa, o qədər də kofe stəkanları və desertlər alınmalıdır”.  
K.Manafov qeyd etdi ki, icarə haqqını nəzərə almasaq, kofeşop açmaq fikriniz varsa, minimum 30 000 manatınız olmalıdır: “İcarə qiymətini də bu məbləğə daxil edib ümumi bir rəqəm çıxarmaq çətindir. Çünki sizin məkanı harda açmağınızdan çox şey asılıdır. Şəhərin mərkəz küçələrində icarə məbləğləri 5 000-10 000 manatdan başlayır”.

“Gloria jeans”, “Starbucks”, “Second cup” deyilsənsə…

Gənc idarəçi deyir ki, tələbat olduğu üçün hər kəs kofeşop açmağa meyillidir, amma biznesi davam etdirmək üçün bəzi nüanslara diqqət edilməlidir: “Şəhərdə tez-tez yeni kofeşop açılır və rəqabət çoxdur. Əgər sən brend, yəni “Gloria jeans”, “Starbucks”, “Second cup” və s.  deyilsənsə, mütləq konseptin olmalıdır ki, rəqabət apara biləsən. Məsələn, “Botanist cafe”, “Fuzzy” kimi kafeləri misal çəkmək olar. Onların müəyyən konseptləri olduğu üçün rəqabət apara bilirlər. Sadə kofeşop açsan, digərlərinin təklif etdiyini etsən, məkan “Tarqovı”da (Fəvvarələr meydanı), yaxud şəhərin hansısa mərkəzi hissəsində deyilsə, çətinlik çəkəcəksən”.

Bəs interyer üçün ən önəmli özəlliklər nələrdir?

“Bir obyektin terrasının olması üstünlükdür. Yayda insanlar terrasda oturmaq istəyirlər. İnteryerdə bir neçə foto zona olması vacibdir. Çünki müştərilər sosial mediada paylaşmaq üçün şəkil çəkdirmək istəyirlər. İnternetin sürətli olması da üstünlükdür. İşləmək üçün kofe məkanlarına üz tutanların da sayı çoxdur” - deyə Kamil Manafov bildirdi.

Nuray